「穿越龍津橋」龍津社區導賞員培訓計劃藝術到家

過去開咗幾場龍津石橋導賞團，小編都忍唔住問自己，究竟150年前嘅龍津橋、九龍城故事，同今日嘅我哋有咩關係？可能有人覺得無乜關係，嗚嗚。畢竟香港實在發展得太快，快速嘅都市更新不停切斷人同過去嘅連結。

但換一個角度睇，過去同今日依然遙遙呼應，只係等我們回頭一望。今日啟德講緊CBD2、郵輪碼頭，但原來早喺150年前，九龍城已經係全個九龍半島最繁華嘅商業區，龍津橋亦係鼎鼎大名嘅碼頭，仲有渡輪來往澳門同廣州，面向世界。

歷史教我哋宏觀一望，過去、現在、未來都係環環相扣。九龍城即將面臨大型重建，喺記憶同遺忘之間，我哋又會唔會選擇記憶？「龍津社區導賞員培訓計劃」邀請一眾導師，從歷史、社區、建築、城市規劃等角度，一齊回顧同放眼九龍城嘅變化，裝備大家成為導賞員，將龍津橋故事分享畀更多人聽。

喺呢個瘋狂嘅加速城市，讀歷史、行社區，我哋一齊坐得穩啲！

更多詳情：https://www.facebook.com/arttogether.hk