簡介
日撚日忙呢忙路，上次「發吽哣」究竟係幾時嘅事呢？
究竟我係度忙緊咩呢？
有無畀過時間自己唞唞，又或者係有冇時間唞呢？
會唔會有人明我過得幾chur，定係大把人仲chur過我呢？
會唔會我咩都唔講，有人都會明白我呢？
究竟幾時先可以唔期待其他人，係追求更好嘅同時，又會愛依家嘅自己呢？
呢個社會幾時先肯俾我地唞唞呢？
就咁繼續發吓吽哣，繼續揾吓啲答案。可能冇答案都唔定呢。
「平地映社」喺2021年第一次舉辦咗「平地影像共學計劃」，聚集咗一班對電影有興趣嘅同學。由「認識電影日營」，到電影評論班、策展基礎堂，後來仲有機會認識咗唔少想試，但未有機會拍電影嘅朋友。
大家摃起「學生評審」嘅身分，第一次去睇連播8個鐘嘅戲，從20部入圍作品當中揀我哋心目中嘅「學生評審團獎」。
喺唔同價值觀互相碰撞嘅過程，大家好投入，過程好有趣。
頒獎典禮有幸同到唔少創作人影相傾計，佩服大家對創作嘅熱衷，好感激自己能夠參與其中。時至今日，經過我哋每星期嘅討論、策劃，一個由學生舉辦嘅放映活動終於出爐喇！
感謝「平地映社」、一眾導師，感謝所有學生導演、創作團隊，感謝一齊經歷呢一切嘅學員，亦感謝你，睇到依度。參加過「平地」嘅朋友都繼續著手創作、拍戲了，有啲仲攞左獎添。
希望呢個放映活動畀到你一個「發吽哣」嘅機會，好好唞氣。
我愛任何瞬間嘅你，你呢？
製作／參與人員
主辦平地映社