介紹全港最大爵士樂家族俾大家認識-Carpio Family
Rosalie喺澳洲墨爾本出世，細細個就喺音樂環境下長大，因為佢媽咪就係音樂老師。畢業後，佢加入咗倫敦著名歌舞團《Black & White Minstrel Show》，跟住團隊巡演澳洲同紐西蘭一年半，最後喺1980年代嚟到香港，本來只係簽一個月合約，點知一留就留到而家！
Rosalie嘅表演場地遍佈香港頂級酒店同私人會所，包括半島酒店、四季酒店、君悅酒店、迪士尼樂園等等。最犀利係佢識唱多國語言，英文、廣東話、普通話、日文、法文、菲律賓話都得，真係想聽佢用咁多語言唱生日歌俾我聽！
Chris 細個就喺音樂世家長大，老竇Tony Carpio係香港著名爵士樂手，佢8歲開始學鋼琴，中學讀英皇佐治五世學校（KGV）時已經係學校爵士樂隊嘅主力成員，後來仲加入埋學校管弦樂團。
佢中學時期原來同朋友組咗搖滾樂隊「Illegal Immigrants」，連續兩年贏咗Warehouse樂隊比賽，佢自己更攞埋「最佳鍵盤手」獎！
不過樂隊喺2010年解散，之後Chris專注玩爵士樂，喺君悅酒店Tiffin Lounge同爵士四重奏定期演出，仲去過上海半島酒店開幕、泰國爵士音樂節、菲律賓Merk’s Bar等地表演。除咗演出，佢仲好熱衷教音樂，希望將自己對音樂嘅熱情傳俾下一代。
Bernard 同哥哥Chris一樣，細細個就受老竇Tony Carpio嘅大樂隊影響，10歲學長笛，15歲轉玩中音薩克斯風，後來仲學埋高音薩克斯風。佢同樣喺KGV讀書時已經係學校爵士樂隊同管弦樂團嘅風頭躉，連續兩年贏咗校際音樂比賽「最佳表演獎」，仲攞過多次音樂成就大獎（Colours Awards）。
而家Bernard周遊列國表演，去過香港同澳門國際爵士音樂節、菲律賓、新加坡、上海同美國嘅爵士酒吧演出，仲同過Kenny B、葉麗儀、王敏德等明星合作。
嚟緊6月6號，佢哋將會嚟到翻騰同台演出！ 一齊嚟感受香港最大爵士家族嘅威力啦！