鹽田梓表演藝術節10月正式登場！

10月4-5日、11-12日連續兩個週末約定你一齊登陸西貢小島，參加以「希望」為主題嘅藝術盛宴！今年有超過25個本地及海外藝團帶來戲劇、舞蹈、音樂、視藝及綜合演出，大人定細路、同老best定同老人家嚟都一定搵到啱你嘅節目～

聖若瑟小堂、澄波舊校、客家村屋，以至成個小島通通化成舞台，可以感受藝術同自然相遇嘅魅力之外，又可以置身神秘、獨一無二嘅期間限定環境「演區」！

到時仲有客家市集，村民公開客家手工藝秘訣！親自教你整茶粿、編花帶，傾吓偈話唔定仲可以學返兩句客家話。

平時嚟鹽田梓都要趕尾班船走，睇唔到日落… 今次特別為你加開6點船！有得喺島上面睇埋日落、打埋卡先慢慢走～ 仲有夜晚限定節目：中秋迎月晚會，食個客家飯、喺小島過一個又Chill 又浪漫嘅晚上！

節目太豐富一次過講唔晒，密切留意我哋，快啲mark定日子，一起踏上希望之旅吧！