簡介
今次好肯定！船到橋頭生活節返嚟喇！2026年11月，我哋將會有第三屆生活節。
今屆生活節想講一個島民一早就知嘅事：跨島地區唔只係地圖上幾個分開嘅點，而係一個彼此連結嘅羣島。渡輪、潮汐，仲有人、物產、信仰、儀式同想法嘅流動，一直塑造住呢片地方。
喺「城市」出現之前，呢啲島嶼已經形成一個自給自足、互相依靠嘅世界。到今日，呢種連結依然存在——喺一次又一次嘅船程裡面，喺資源同習俗嘅交流之中，亦係島嶼生活特有嘅節奏同空間感入面。
2026年船到橋頭生活節想邀請大家一齊重新用「羣島」嘅角度去睇呢幾個離島——流動、親密、共生。如果我哋唔再將離島視為城市嘅邊緣，而係一個獨立於城市、連成一體、仍然生長緊嘅地方，又會睇到啲咩新可能？
由長洲、芝麻灣、梅窩到坪洲，一齊加入呢個由海帶住我哋走嘅故事。