Q：你最喜愛的角色是誰？為甚麼？
洛林Lorraine：隨住我cos過嘅角色愈來愈多，每詮釋一個角色，我都會對佢增加一份好感，所以我漸漸冇一個最最最最中意嘅角色。但我可以舉出其中一個令我印象最深刻嘅角色，就係《進擊的巨人》嘅吉克。
吉克認為艾爾迪亞人誕生於世，只會承受不斷循環嘅歧視、痛苦同死亡，所以佢認為「從未出生先係真正嘅救贖」。呢種理念正正就係反生育主義，而我自己都對生命有好相似嘅反思。
有一個令我有好深刻感悟嘅情景：吉克死前喺「道」見到阿爾敏手上嘅棒球，令佢諗起自己細個其實都好享受同庫沙瓦玩拋接球嘅時光，唔係為咗完成任何目標，而係純粹享受玩拋接球嘅過程。我自己都好容易陷入虛無主義，但呢個場景成日都可以將我拉返出嚟。其實人生可以係毫無意義，如果我哋可以單純地享受人生當中嘅經歷，咁虛無都唔會令人咁痛苦。既然喺無法選擇之下出咗世，不如就學會享受生命。
|
